Канон молебный при разлучении души от тела (от лица человека, с душею разлучающагося и не могущаго глаголати)

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Tрижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй (12 раз).

Прииди́те, поклони́мся Царе́ви на́шему Бо́гу. (Поклон)

Прииди́те, поклони́мся и припаде́м Христу́, Царе́ви на́шему Бо́гу. (Поклон)

Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)

Псалом 50

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; яко беззако́ние мое́ аз зна́ю, и грех мой пре́до мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твое́го и Ду́хом влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Канон молебный Господу нашему Иисусу Христу и Его Пречистой Матери, при разлучении души с телом

Глас 6‑й

Песнь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Пресвята́я Богоро́дице, спаси́ нас.

Ка́плям подо́бно дожде́вным, зли́и и ма́лии дни́е мои́, ле́тним обхожде́нием оскудева́юще, пома́лу исчеза́ют уже́. Влады́чице, спаси́ мя.

Пресвята́я Богоро́дице, спаси́ нас.

Твои́м благоутро́бием и мно́гими щедро́тами Твои́ми, Влады́чице, преклоня́ема есте́ственно, в час сей ужа́сный предста́ни ми, Помощни́це Непобо́римая.

Пресвята́я Богоро́дице, спаси́ нас.

Содержи́т ны́не ду́шу мою́ страх вели́к, тре́пет неисповеди́м и боле́знен есть, внегда́ изы́ти ей от телесе́, Пречи́стая, ю́же уте́ши.

Сла́ва Отцу́ и Сы́ну и Свято́му Ду́ху.

Гре́шным и смире́нным изве́стное прибе́жище, о мне извести́ Твою́ ми́лость, Чи́стая, и бесо́вския изба́ви руки́, я́коже бо пси мно́зи обступи́ша мя.

И ны́не и при́сно и во ве́ки веко́в. Ами́нь.

Се вре́мя по́мощи, cе вре́мя Твоего́ заступлéния, се, Влады́чице, вре́мя, о нéмже день и нощь припа́дах те́пле и моля́хся Тебе́.

Песнь 3

Ирмо́с: Несть свят, я́коже Ты, Го́споди Бо́же мой, вознесы́й рог ве́рных Твои́х, Бла́же, и утверди́вый нас на ка́мени испове́дания Твоего́.

Пресвята́я Богоро́дице, спаси́ нас.

Издале́ча сего́ дне, Влады́чице, прови́дя, и того́ я́ко прише́дша помышля́яй при́сно, слеза́ми те́плыми моля́хся не забы́ти мене́.

Пресвята́я Богоро́дице, спаси́ нас.

Обыдо́ша мя мы́сленнии рыка́юще ски́мны, и и́щут восхи́тити и растерза́ти мя го́рце, и́хже зу́бы, Чи́стая, и че́люсти сокруши́ и спаси́ мя.

Пресвята́я Богоро́дице, спаси́ нас.

Уга́сшу у́бо отню́д орга́ну слове́сному, и связа́вшуся язы́ку, и затвори́вшуся гла́су, в сокруше́нии се́рдца молю́ Тя, Спаси́тельнице моя́, спаси́ мя.

Сла́ва Отцу́ и Сы́ну и Свято́му Ду́ху.

Приклони́ у́хо Твое́ ко мне, Христа́ Бо́га моего́ Ма́ти, от высоты́ мно́гия сла́вы Твоея́, Блага́я, и услы́ши стена́ние коне́чное и ру́ку ми пода́ждь.

И ны́не и при́сно и во ве́ки веко́в. Ами́нь.

Не отврати́ от мене́ мно́гия щедро́ты Твоя́, не затвори́ утро́бу Твою́ человеколю́бную, Чи́стая; но предста́ни ми ны́не и в час су́дный помяни́ мя.

Песнь 4

Ирмо́с: Христо́с моя́ си́ла, Бог и Госпо́дь, честна́я Це́рковь боголе́пно пое́т, взыва́ющи, от смы́сла чи́ста о Го́споде пра́зднующи.

Пресвята́я Богоро́дице, спаси́ нас.

Умове́ние согреше́нием, ток сле́зный ны́не положи́, Блага́я, се́рдца моего́ сокруше́ние прие́млющи: о Тебе́ утвержда́ющу упова́ние, Блага́я, егда́ ка́ко стра́шнаго мя изба́виши о́гненнаго муче́ния, я́ко Сама́ благода́ти еси́ исто́чник, Богороди́тельнице.

Пресвята́я Богоро́дице, спаси́ нас.

Непосты́дное и Непогреши́тельное всем, и́же в ну́ждах, прибе́жище, Влады́чице Пренепоро́чная, Ты ми бу́ди Засту́пница в час испыта́ния.

Пресвята́я Богоро́дице, спаси́ нас.

Просте́рши Пречи́стеи Твои́ и Всечестне́и ру́це, я́ко свяще́ннии голуби́не криле́, под кро́вом и се́нию тех покры́й мя, Влады́чице.

Сла́ва Отцу́ и Сы́ну и Свято́му Ду́ху.

Возду́шнаго кня́зя наси́льника, мучи́теля, стра́шных путе́й стоя́теля и напра́снаго сих словоиспыта́теля, сподо́би мя прейти́ невозбра́нно отходя́ща от земли́.

И ны́не и при́сно и во ве́ки веко́в. Ами́нь.

Се мя, Влады́чице, страх усре́те, его́же и боя́хся; се по́двиг вели́к объя́т мя, в не́мже бу́ди ми Помо́щница, Наде́жде спасе́ния моего́.

Песнь 5

Ирмо́с: Бо́жиим све́том Твои́м, Бла́же, у́тренюющих Ти ду́ши любо́вию озари́, молю́ся, Тя ве́дети, Сло́ве Бо́жий, И́стиннаго Бо́га, от мра́ка грехо́внаго взыва́юща.

Пресвята́я Богоро́дице, спаси́ нас.

Не забу́ди мя, Блага́я, ниже́ отврати́ от мене́, Твоего́ о́трока, лице́ Твое́, но услы́ши мя, я́ко скорблю́, и вонми́ души́ мое́й, и сию́ изба́ви.

Пресвята́я Богоро́дице, спаси́ нас.

И́же по пло́ти, сро́дницы мои́, и и́же по ду́ху бра́тие, и дру́зи, и обы́чнии зна́емии, пла́чите, воздохни́те, се́туйте, се бо от вас ны́не разлуча́юся.

Пресвята́я Богоро́дице, спаси́ нас.

Ны́не избавля́яй ника́ко и помога́яй вои́стинну никто́же. Ты помози́ ми, Влады́чице, да не я́ко челове́к безпо́мощен, в рука́х враг мои́х затворе́н бу́ду.

Сла́ва Отцу́ и Сы́ну и Свято́му Ду́ху.

Вше́дше, святи́и мои́ А́нгели, предста́ните суди́щу Христо́ву, коле́не свои́ мы́сленнеи прекло́ньше, плаче́вне возопи́йте Ему́: поми́луй, Тво́рче всех, де́ло рук твои́х, Бла́же, и не отри́ни его́.

И ны́не и при́сно и во ве́ки веко́в. Ами́нь.

Покло́ньшеся Влады́чице и Пречи́стей Ма́тери Бо́га моего́ помоли́теся, я́ко да прекло́нит коле́на с ва́ми, и прекло́нит Его на ми́лость: Ма́ти бо су́щи и пита́тельница услы́шана бу́дет.

Песнь 6

Ирмо́с: Жите́йское мо́ре, воздвиза́емое зря напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мой, Многоми́лостиве.

Пресвята́я Богоро́дице, спаси́ нас.

Устне́ мои́ молча́т, и язы́к не глаго́лет, но се́рдце веща́ет: огнь бо сокруше́ния сие́ снеда́я внутрь возгара́ется, и гла́сы неизглаго́ланными Тебе́, Де́во, призыва́ет.

Пресвята́я Богоро́дице, спаси́ нас.

При́зри на мя свы́ше, Ма́ти Бо́жия, и ми́лостивно вонми́ ны́не на мое́ посеще́ние сни́ти, я́ко да ви́дев Тя, от телесе́ изы́ду ра́дуяся.

Пресвята́я Богоро́дице, спаси́ нас.

Растерза́еми соу́зы, раздира́еми зако́ни есте́ственнаго сгуще́ния, и составле́ния всего́ теле́снаго, ну́жду нестерпи́мую и тесноту́ сотворя́ют ми.

Сла́ва Отцу́ и Сы́ну и Свято́му Ду́ху.

Святы́х А́нгел свяще́нным и честны́м рука́м преложи́ мя, Влады́чице, я́ко да тех кри́лы покры́вся, не ви́жу безче́стнаго и смра́днаго и мра́чнаго бесо́в о́браза.

И ны́не и при́сно и во ве́ки веко́в. Ами́нь.

Черто́же Бо́жий всече́стне, небе́сному разу́мному черто́гу сподо́би мя, мою́ уга́сшую и несия́ющую свещу́ вже́гши, святы́м еле́ем ми́лости Твоея́.

Кондак, глас 6‑й:

Душе́ моя́, душе́ моя́, воста́ни, что спи́ши, коне́ц приближа́ется, и ну́жда ти мо́лвити: воспряни́ у́бо, да пощади́т тя Христо́с Бог, И́же везде́ сый, и вся исполня́яй.

Икос

Христо́во врачевство́ ви́дя отве́рсто, и от сего́ Ада́му источа́юще здра́вие, пострада́в уязви́ся диа́вол, я́ко беды́ прие́мля рыда́ше, и свои́м друго́м возопи́: что сотворю́ Сы́ну Мари́ину? Убива́ет мя Вифлее́млянин, И́же везде́ сый и вся исполня́яй.

Песнь 7

Ирмо́с: Росода́тельну у́бо пещь соде́ла А́нгел, преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Пресвята́я Богоро́дице, спаси́ нас.

Нощь сме́ртная мя пости́же негото́ва, мра́чна же и безлу́нна, препуща́ющи непригото́влена к до́лгому о́ному пути́ стра́шному; да спутеше́ствует ми Твоя́ ми́лость, Влады́чице.

Пресвята́я Богоро́дице, спаси́ нас.

Се вси дни́е мои́ исчезо́ша вои́стинну в суете́, я́коже пи́шется, и ле́та моя́ со тща́нием, се́ти же сме́ртныя вои́стинну и го́рькия предвари́ша мою́ ду́шу, я́же мя обдержа́т.

Пресвята́я Богоро́дице, спаси́ нас.

Мно́жество грехо́в мои́х да не возмо́жет победи́ти Твоего́ мно́гаго благоутро́бия, Влады́чице, но да обы́дет мя Твоя́ ми́лость и вся да покры́ет беззако́ния моя́.

Сла́ва Отцу́ и Сы́ну и Свято́му Ду́ху.

Отводя́щии мя отсю́ду нахо́дят, содержа́ще мя всю́ду: душа́ же моя́ отлага́ет и страши́тся, мно́га испо́лнена мятежа́, ю́же уте́ши, Чи́стая, явле́нием Твои́м.

И ны́не и при́сно и во ве́ки веко́в. Ами́нь.

Спеча́лующаго ниеди́наго в ско́рби мое́й, ниже́ утеша́ющаго обрето́х, Влады́чице, и́бо дру́зи мои́ и зна́емии вку́пе оста́виша мя ны́не, но, Наде́жде моя́, ника́коже да не оста́виши мя.

Песнь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́, вся бо твори́ши, Христе́, то́кмо е́же хоте́ти. Тя превозно́сим во вся ве́ки.

Пресвята́я Богоро́дице, спаси́ нас.

Я́ко Бо́га Человеколю́бца Ма́ти Человеколюби́вая, ти́хим и ми́лостивым вонми́ о́ком, егда́ от те́ла душа́ моя́ отлуча́ется, да Тя во вся ве́ки сла́влю, Свята́я Богоро́дице.

Пресвята́я Богоро́дице, спаси́ нас.

Убе́гнути ми ва́рвар безпло́тных полки́, и возду́шныя бе́здны возни́кнути, и к Небеси́ взы́ти мя сподо́би, да Тя во ве́ки сла́влю, Свята́я Богоро́дице.

Пресвята́я Богоро́дице, спаси́ нас.

Ро́ждшая Го́спода Вседержи́теля, го́рьких мыта́рств нача́льника мироде́ржца отжени́ дале́че от мене́, внегда́ сконча́тися хощу́, да Тя во ве́ки сла́влю, Свята́я Богоро́дице.

Сла́ва Отцу́ и Сы́ну и Свято́му Ду́ху.

Вели́кой после́дней глася́щей трубе́, в стра́шное и гро́зное воскреше́ние суда́, воскреса́ющым всем, помяни́ мя тогда́, Свята́я Богоро́дице.

И ны́не и при́сно и во ве́ки веко́в. Ами́нь.

Высо́кая Влады́ки Христа́ пала́то, Твою́ благода́ть свы́ше посла́вши, предвари́ мя ны́не в день озлобле́ния, да Тя сла́влю во ве́ки вся, Свята́я Богоро́дице.

Песнь 9

Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти. Тобо́ю же, Всечи́стая, яви́ся челове́ком Сло́во Воплоще́нно. Его́же велича́юще, с Небе́сными во́и, Тя ублажа́ем.

Пресвята́я Богоро́дице, спаси́ нас.

О, ка́ко узрю́ неви́димаго? Ка́ко ужа́сное о́но претерплю́ виде́ние? Ка́ко дерзну́ отве́рсти о́чи? Ка́ко моего́ Влады́ку сме́ю ви́дети, Его́же не престая́х от ю́ности огорчева́я при́сно?

Пресвята́я Богоро́дице, спаси́ нас.

Свята́я Отрокови́це, Богороди́тельнице, на мое́ смире́ние милосе́рдно при́зри, умиле́нное мое́ и после́днее моле́ние сие́ прии́мши, и му́чащаго ве́чнующаго огня́ потщи́ся изба́вити мя.

Пресвята́я Богоро́дице, спаси́ нас.

Хра́мы святы́я оскверни́вшая, скве́рный и теле́сный храм оста́вивши, Тебе́, Бо́жий всечестны́й хра́ме, мо́лит, Отрокови́це Де́во Ма́ти, душа́ моя́ тьмы кроме́шния убежа́ти и лю́таго гее́нскаго жже́ния.

Сла́ва Отцу́ и Сы́ну и Свято́му Ду́ху.

Зря коне́ц бли́зу жития́ моего́, и помышля́я безме́стных мы́слей, дея́ний же, Всечи́стая, ду́шу мою́ де́лательницу, лю́те уязвля́юся стрела́ми со́вести, но прекло́ньшися ми́лостивно, буди́ ми Предста́тельница.

И ны́не и при́сно и во ве́ки веко́в. Ами́нь.

Сын да́стся нам за ми́лость, Сын Бо́жий и А́нгельский Царь Преве́чный, от чи́стых крове́й Твои́х Челове́к проше́д. Его́же уми́лостиви, Отрокови́це, стра́стней мое́й душе́, исторга́емой лю́те от окая́ннаго моего́ телесе́.

Таже: Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем (поклон).

Источник